"CORREIO RIOGRANDENSE"
Caxias do Sul - Rio Grande do Sul - 11/05/2005

LEITORES
DESCOBRINDO CAMINHOS

Desde 1909, onde o conteúdo faz a diferença.
Edição 4.936 - Ano 97 - Caxias do Sul-RS, 11 de maio de 2005.











CULTURA DA IMIGRAÇÃO
O Vêneto que está em mim
Ettore Beggiato
Político, Padova, Itália

Ser Italiano, Talian ou Vêneto na Itália e no mundo faz a diferença, no pensar de Ettore Beggiato:

"A sò nato a Campìglia dei Berici-VI el 4-8-1954, ma a sò sempre stà a Grumolo delle Abbadesse-VI. Desso stao a Bàstia de Rovolon-PD, drento el parco dei Colli Euganei, che i ze sempre stà ciamai Monti, ma Colli ze pi fin, i dise lori.
A go studià da rajonier e a go scominsià a lavorar sora i computer, soto paron. A go cambià quatro posti e a go laorà anca a Trento, dove che me sò iscrito a la Università de sociologia e a go fato qualche esame e dove che go scomissià a sentir parlar de autonomia. Cossita, nel 1980, a sò stà uno dei primi a ndar drento a la Liga Véneta che lora la jera pròprio pena nata. A sò stà consilier regional dal 1985 al 2000, assessor dal 1993 al 1995, e desso a sò consilier provincial a Vicenza. La me passion, pi che la puìtica, la ze sempre stà la stòria, la cultura e la léngua véneta e a go anca scrito qualcossa, metendo insieme on poche de ricerche che gavea fato par conto mio. Lora a go stampà L’idea federalista nel Véneto, che la ze na racolta de scriti federalisti: 1866, la grande truffa - sora el plebiscito che ga fato passar el Véneto soto l’Itàlia, visto che nessuni a ghe ne parla, e desso a sò drio finir on livro sol 1809 e so la rivolussion véneta contro Napoleon.
Nel 1995, a sò stà nominà, e par mi l’è stà on onor tanto grando, sitadin serafinense dela Prefeitura de Serafina Correa-RS, Brasil, par quelo che gavea fato come assessor a l’emigrassion quando che jera in Region.
Parlar de L’italiano che è in me me par inpossibile, parchè mi a no sò mia italiano, mi a sò véneto! Vedemo se sò bon de spiegarme puito. Par mi ghè talian, véneto e italiano, i ze tre mondi diversi, par conto suo.
El mondo talian el ze on mondo, par mi, che’l me fa vegner ancora el pel de oca, che a go scoverto nel 1993, e che el me ga lassà drento na emosson granda par quelo che ga fato la nostra zente de là del mar, par quelo che la nostra zente ze stà bona de far anca par mantegner le so raìse, la so léngua, la so cultura, la so civiltà.
El mondo véneto el ze el me mondo, la me tera, el me pòpolo, la me Pàtria e mi a sò pròprio pien de orgóglio quando che vedo sventolar la nostra bandiera véneta col leon de San Marco, o quando che sento parlar la nostra léngua; orgóglio, ma anca dispiaser e ràbia par come che ze ridoto el Véneto al di de ancó. E qua el discorso se faria longo, ma a penso che on pòpolo che no’l ga la dimension de la so stòria e de la so cultura el fa fadiga a vardar con speransa al diman.
El mondo italiano che non el ze el me mondo. Par mi l’Itàlia la ze on stato sovranassionale come la Spagna o la Gran Bretagna e drento a sti stati ghe ze tanti pòpoli, che, come el nos-tro véneto, i va considerà le vere nassion stòriche europee. E lora trovemo véneti, friulani, sardi, siciliani in Itàlia, catalani, baschi, galleghi in Spagna, scossesi, inglesi e gallesi in Gran Bretagna. E mi, a el Stato Italiano ghe incolpo el fato de ver portà vanti na puìtica par farne diventar tuti precisi, tuti italiani: e cusì i véneti non i sa gniente de la so stòria, i se vergogna de parlar la so léngua e i perde on poco a la volta la so identità.
Ze restando véneti, friulani, catalani, scossesi che se se bate contro la globalisassion. Che mondo saralo quando che parlaremo tuti na stessa léngua, che magnaremo tuti a lo stesso modo e che bevaremo tuti la stessa bìbita? Véneti restemo véneti, e taliani restè taliani!" (26-4-2005), e-mail: bejato@hotmail.com

Como ítalo-gaúchos, ou ítalo-brasileiros, nos denominamos Talianos, porque o falar que aqui formamos engloba palavras de todas as falas da Península.